SUREALISME CARIOS SI URAT EMAS


 

SUREALISME CARIOS SI URAT EMAS

 

Macaan 9 carpon Kang Godi Suwarna (GS) dina kumcar “Carios Si Urat Emas” (CSUE), kaluaran Penerbit Silantang (2018),  mah imajinasi téh asa diajak “jalan-jalan’’ kamana karep. Mayoritas carpon surealisme, tapi nu realisme gé aya. Matak pogot macana, maké basa anu gampang dilenyepan.

Loba dongéng nu ahéng, teu kaharti ku akal, kayaning Dewi anu ngadadak ngalobaan dina “Lalakon Kadalon-dalon”. Sakapeung rada kerung, naha sirah bisa coplok tuluy napel deui dina beuheung. Atawa orok beureum nu roroésan di pabrik dina “Carita Cap Dua Anting”, jeung naha aya bapa anu téga nyaté budak awéwéna lantaran dianggap mawa sial ka kulawarga Mang Saman dina “Lain Carita Pondok”.

Kasalapan carpon dina buku CSUE meunang dikumpulkeun tina karya-karya GS nu heubeul (1997-2001). Najan kitu, ari jejer caritana mah da teu karasa “out of date”. Malah mah masih kénéh wé cocog jeung mangsa kiwari. Mun ceuk bahasa gaulna mah karasa kénéh “kekinian.” Apanan ongkoh cenah pangarang téh boga kamampuh “melintasi jaman” (ari ulah disebut “indera keenam” mah). Contona dina palebah ngadongéngkeun kumaha pajabat anu korupsi hasil sumbangan ti rahayat nu ngahaja dikumpulkeun jangeun ngabéla nagara nu keur werit. Pan jaman kiwari gé adat koruptor mah masih kitu kénéh waé.

Carpon-carpon dina kumcar CSUE lian ti arahéng téh, ogé matak ngahuleng sakedapan (keur sakuringeun mah). Sabab pasipatan manusa nu dicaritakeun dina unggal tokoh carpon bisa waé jadi eunteung yén urang ogé boa kitu. Sarua munapék, sarua sarakah, sarua gélo, jeung sarua baluwengna dina nyanghareupan pasualan hirup. Sarua jadi jelema anu bingung kudu kumaha ngabandungan harga-harga nu mingkin undak ngajaul. Boro-boro meuli sédan tina hasil korupsi siga Pa Kuwu dina “Carios Si Urat Emas”, sedengkeun jang dahar gé masih koréh-koréh cok. Atuh boa teuing urang téh dianggap jelema burung modél si Awon nu teu weléh imut dina “Lalakon Awon,”  padahal nu nyebutkeun burung gé malah mah sawelas dua welas, euweuh mendingna.

Lay out rapih, jeung disain koverna gé jempol wé pokona mah. Moal matak kaduhung maca kumpulan carpon ieu mah. Éstuning matak resep ngagulang-gapérna. Wilujeng.

 

#RAB, 7 Januari 2019

 

===

Judul Buku: Carios Si Urat Emas

Pangarang: Godi Suwarna

Kandel buku: 139 kaca

Penerbit: Silantang (2018)

Iklan

2 thoughts on “SUREALISME CARIOS SI URAT EMAS

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google

You are commenting using your Google account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s